1. Loan lak nan hian eng documents te nge mortgage theih?

Revenue Department in Pass/LSC a pekchhuahte hi Loan lak nan a dahkham(mortgage) theih vek a. Amaherawh chu heng House Pass, Shop Pass, Stall Pass, Periodic Patta leh Land Lease te hi a nghet lova nei an nih avangin dahkham tur hian Sorkar phalna lak hmasak phawt tur ani a, dilna thehluh anih hnuah Sorkar phalna la turin thawn thin ani.

2. Loan lakna tura LSC/Periodic Patta/Pass/Property Card etc te mortgage tur hian eng documents te nge ngai?

Loan lakna atan LSC/Periodic Patta/House Pass/Property Card etc te dahkham turin heng a hnuaia documents te hi tih tel tur ani:-

1. Mortgage tur Land documents original.
2. Revenue Department atangin mortgage tur Land Documents chu a felfai ngei ani tih finfiahna tur Clearance Certificate.
3. Chhiahpekna hnuhnung ber.
4. Loan lakna tur Bank atangin ‘Mortgage Deed’ lak tur.
5. LSC/Periodic Patta etc neitu Voter ID.

3. Loan lakna atana Land Documents dahkham (mortgage) hi engtia buaipui tur nge?

Loan lakna tur Bank in ‘Mortgage Deed’ an lo siamsa chu Indian Registration Act hnuaiah register phawt tur ani a. Registration dilna hi online in Common Service Centre atangin thehluh tur ani. Registration tihfel anih hnuah mahni Loan lakna tur Bank lam dawr leh mai tur ani.

4. Land documents mortgage tur hian pawisa chawi ngai a aw em?

Mortgage Deed register-na fee leh stamp duty te pek a ngai a, hei bakah ah hian Office Records a lo chhinchhiahna fee pek a ngai bawk.